::: ڕۆژی یه‌ك شه‌ممه، یه‌ك شه‌ممه‌ی شه‌ممه‌كان‌:

كاتژمێر 12ی نیوه‌ڕۆ:
له‌ ئیشه‌كه‌م بووم. كوردێك هاته‌ ژووره‌وه، دیار بوو پرسیارێکی هه‌بوو له‌ سه‌ر كامێرای دیجیتاڵ، به‌ كوردی پێی گووتم: ' كاكه‌ گیان به‌ كوردی قسه‌ ئه‌كه‌یت؟'
عه‌یب بوو ژن و ماڵی له‌ گه‌ڵ بوو ئه‌گینا پێم ئه‌گووت: ' برا پێ ڕابواردنی سێ مانگی داهاتووت له‌ سه‌ر خۆمان'
هه‌رچه‌ندم كرد ویستم هیچ نه‌ڵێم له‌ ڕووی پرسیارێکی وا نا ماقووڵا به‌ڵام ئاخیره‌ن خۆم نه‌گرت و پیم گووت ' I will try'.
ناوه‌ڕۆكی ڕووداو: كورد زۆر ساویلكه‌یه‌.

ده‌ورو به‌ری سه‌عات 2ی نیوه‌ڕۆ:
كیژێكی سۆماڵی هاته‌ ژووره‌وه‌ داوای تازه‌كردنه‌وه‌ی خه‌تی مۆبایله‌كه‌ی د‌‌ه‌‌كرد. كاره‌كه‌ ده‌وری 30 ده‌قه‌ی ده‌خایاند. له‌و 30 ده‌قه‌یه‌دا 3 جار ته‌له‌فۆنی كرد هه‌ر جاره‌و ئه‌یگووت ' حبیبی یا....' منیش خۆم پێ نه‌گیرا پێم گووت ' دیاره‌ حه‌بیبی زۆرت هه‌یه‌؟' ئه‌ویش له‌وه‌ڵامدا پێی گووتم ' ئه‌گه‌ر به‌دڵته‌ تۆش وه‌ره‌ ڕیزه‌وه‌'
ناوه‌ڕۆكی ڕووداو: په‌ح له‌ كچی ئه‌م زه‌مانه‌.

كاتژمێر 4ی عه‌سر:
زۆرم برسی بوو چووم نان بخۆم. 20 ده‌قه‌ له‌ڕیزا وه‌ستام بۆ له‌فه‌یه‌کی بگ ماك. كه‌چی كه‌ ده‌ستم كرد به‌ گیرفانما، جزدانه‌كه‌م له‌ بیر چوو بوو.
ناوه‌ڕۆكی ڕووداو: هه‌ندێ جار قسه‌ی بێ سوودیش خۆشه!

::: به‌یانی بوو،
له‌و ڕۆژانه‌ بوو كه‌ پیاو خوا خوایه‌تی پێی بڵێن ئه‌وا بینای خوێندنگاكه‌ت گڕی تێ به‌ر بووه‌و ئیمڕۆ ده‌خیلت بم نه‌یه‌یت بۆ دانیشتگا.. به‌ هه‌ر حاڵ، شانسی كورد وه‌هاش نیه‌ ئه‌م هه‌‌واڵه‌ خۆشانه‌ ببیستێت له‌ شه‌شی به‌یانیدا. هه‌ر بۆیه‌ گووتم ' هه‌سته‌ كوڕه‌ با ئه‌مه‌شی بچێته‌ سه‌ر... بۆ حوكومه‌تی شۆڕشی هۆ‌ڵه‌ندی ده‌كه‌ین، به‌ زایه‌ع ناچێت' .

له‌ ڕێ،
ده‌مویست بیر له‌ هه‌موو شتێك بكه‌مه‌وه‌ بێجگه‌ له‌خوێندن. چونكه‌ گه‌یشتبوومه‌ قه‌ناعه‌تێك كه‌ باشتر وایه‌ ئیدی به‌یانیان نان و كتێب بخۆم باشتره‌ وه‌ك له‌ چاو ماست، ئه‌وه‌نده‌ به‌ خوێندنه‌وه‌ خه‌ریكم. زۆری نه‌برد له‌ یه‌كێك له‌ سوچه‌ چاوه‌ڕوان نه‌كراوه‌كانی یادگاریم ناوی ' وێب بلاگم' هاته‌وه‌ یاد. دوای مشت و مڕێك له‌ گه‌ڵ خۆمدا بڕیاڕم دا ده‌ست كه‌مه‌وه‌ به‌ نووسین.

ئێستا،
هاتمه‌ وێب بلاگ. دوای ته‌ماشا كردنێكی خێرا به‌ وێب بلاگه‌كاندا ،بینم كه‌ زۆر نه‌گۆڕاوه‌. به‌ عه‌مری خوا، كه‌ هه‌ر ئه‌و ناوانه‌م دی، حه‌زم كرد خێر شتێك بنووسم. له‌وه‌ ده‌چوو له‌ سه‌فه‌رێكی دوور هاتبمه‌وه‌ ژووره‌ خنجیلانه‌كه‌م...